Sólveig Sigurðardóttir stundaði nám í píanóleik frá unga aldri. Hún nam síðan óbóleik við Tónlistarskólann í Reykjavík og lék á óbó m.a. með Sinfóníuhljómsveit unga fólksins og Sinfóníuhljómsveit Íslands. Hún hóf söngnám við Tónskóla Þjóðkirkjunnar hjá Jóni Þorsteinssyni árið 2006 og lauk þaðan prófi í kórstjórn 2009. Hún lauk B.Mus. í klassískum söng frá Het Utrechts Conservatorium í Hollandi 2013 þar sem kennarar hennar voru Jón Þorsteinsson og Charlotte Margiono, og stundaði einnig söngnám við Tónlistarskólann í Reykjavík hjá Hlín Pétursdóttur og Þórunni Guðmundsdóttur. Vorið 2018 lauk hún meistaragráðu í sköpun, miðlun og frumkvöðlastarfi (NAIP) frá Listaháskóla Íslands, með söng sem aðalfag. Í janúar 2018 hlaut hún 2. verðlaun og áhorfendaverðlaunin í söngkeppninni Vox Domini.

Sólveig er kórstjóri Harmóníukórsins og er annar tveggja listrænna stjórnenda sönghópanna Kyrju og Yrkju. Hún var hljómsveitarstjóri í uppfærslu á Tveimur ævintýraóperum eftir Þórunni Guðmundsdóttur í Iðnó í október 2023 og á Hliðarsporum, einnig eftir Þórunni Guðmundsdóttur, í Gamla Bíói í febrúar 2025. Hún verður hljómsveitarstjóri í uppsetningu á Sæmundi fróða eftir Þórunni Guðmundsdóttur sem frumsýnd verður í apríl 2026 í Tjarnarbíói.

Sólveig starfar sem söngkona, söngkennari, hljómsveitarstjóri og kórstjóri, auk þess að stunda þýðingar og útsetningar.

Hlutverk í uppsetningum Óðs:

ÁSTARDRYKKURINN
           – Adina
           – Þýðing að hluta

DON PASQUALE
           – Norina
           – Þýðing

PÓST-JÓN
           – Ingibjörg Hannesdóttir / Fröken Løvenkrands
           – Handrit, þýðing og leikgerð

RAKARINN Í SEVILLA
           – Rosina
           – Handrit, þýðing og leikgerð

LA BOHÈME
           – Mimi
           – Handrit, þýðing og leikgerð