Bakhjarlar Óðs eru hópur fólks um allt land sem styrkir hópinn mánaðarlega um upphæð að þeirra eigin vali.
Framlög bakhjarla skipta öllu máli fyrir Óð og mynda burðarás starfsins yfir löng tímabil.
Án þeirra stuðnings gætum við ekki haldið úti okkar starfi.
Á fyrstu 4 starfsárum sínum hefur Óður sett upp 5 klassískar óperur frá Ítalíu og Frakklandi, sem njóta hylli margra úti í hinum stærri óperuheimi. Uppfærslur Óðs er þó aðeins að finna á Íslandi, því sérhver þeirra er smíð hópsins í nýrri íslenskri þýðingu, leikgerð og aðlögun. Markmið Óðs hefur frá upphafi verið að færa óperuformið nær hinum almenna borgara og hafa áhrif hópsins á óperulandslag Íslands verið veruleg.
Óður er hópur sem starfar árið um kring. Við erum alla jafna með 3-4 óperur í sigtinu fyrir næstu uppfærslu en rannsóknarvinnan að baki þeirra teygir sig til bókmennta, sagnfræði og fordæma í mörgum öðrum miðlum, svo fátt eitt sé nefnt. Þýðing og aðlögun næsta verks hefst strax eftir frumsýningu þess fyrra og er margra mánaða vinna sem endar yfirleitt ekki fyrr en í frumsýningarviku.
Gegnum þetta ferli þræðist útlitshönnun sýningar og markaðsefnis, ráðningar í hlutverk inni á sviði sem utan, leit að sýningarrými og annað utanumhald. Loks hefjast formlegar tónlistar- og leiklistaræfingar 2-3 mánuðum fyrir frumsýningu og þá er okkar vertíð hafin sem ryður öllu öðru frá. Vertíðinni lýkur á frumsýningu en þá tekur við sýningartímabil og samhliða því hefst þýðing næsta verks.
Sá forði sem safnast gegnum frjáls framlög bakhjarla Óðs er ómetanlegur til að halda starfinu gangandi milli sýninga.
„Framtíðin er björt! Óður er eitthvert alskemmtilegasta fyrirbæri í íslensku menningarlífi um þessar mundir.“